Tajik Technical University named after academician M.S.Osimi

РОҲҲОИ ТАРБИЯИ ҶАВОНОН БО ИСТИФОДА АЗ БОЗИҲОИ ПСИХОЛОГӢ

Ҷавонон ояндаи ҳар як давлат мебошанд. Тарбияи дурусти онҳо вазифаи муҳим аст. Имрӯз усулҳои кӯҳнаи тарбия камтар кор медиҳанд. Ҷавонони асри навро бояд бо усулҳои нав тарбия кард.

Бозиҳои психологӣ яке аз усулҳои беҳтарини муосир мебошанд. Онҳо ба ҷавонон имкон медиҳанд, ки худро шиносанд. Ин бозиҳо раванди тарбияро шавқовар ва муассир мекунанд.

Чаро бозиҳои психологӣ муҳиманд? Бозиҳои психологӣ танҳо барои дилхушӣ нестанд. Онҳо асбоби пуриқтидори таълим ва тарбия мебошанд. Ин бозиҳо ба ҷавонон кумак мекунанд, ки хислатҳои хуби худро инкишоф диҳанд, камбудиҳои худро пайдо ва ислоҳ кунанд, муошират карданро бо дигарон ёд гиранд, дар ҳолатҳои стресс худро ба даст гиранд.

Ҷавонон ҳангоми бозӣ худро озод ҳис мекунанд. Онҳо тарсу ҳаросро фаромӯш мекунанд. Маҳз дар ҳамин ҳолат тарбияи онҳо осонтар мешавад.

Мо дар ин маводи тарбиявӣ дар бораи намуди бозиҳо ва таъсири онҳо ба тарбия чанд лаҳзаҳоеро ёдовар мешавем, ки ниҳорят муҳиманд:

1. Бозиҳо барои худшиносӣ. Ин бозиҳо ба ҷавон кумак мекунанд, ки олами ботинии худро фаҳмад. Масалан, бозии «Ман кистам?». Ҷавон дар бораи худ, мақсадҳо ва орзуҳояш нақл мекунад. Ин усул боварии ҷавонро ба худаш зиёд мекунад. Вай мефаҳмад, ки дар ҷомеа чӣ ҷойгоҳ дорад.
2. Бозиҳо барои ҳамкорӣ ва кори гурӯҳӣ. Ҷавонони имрӯза баъзан гӯшанишин мешаванд. Бозиҳои гурӯҳӣ, ба монанди «Ҷазира» ё «Мафияи психологӣ» онҳоро муттаҳид мекунанд. Ҷавонон якҷоя кор карданро меомӯзанд, онҳо ба фикри дигарон эҳтиром гузоштанро ёд мегиранд, ҳисси касбияти онҳо ва масъулиятшиносӣ бедор мешавад.
3. Бозиҳо барои ҳалли низоъҳо (конфликтҳо). Дар синни ҷавонӣ қаҳру ғазаб зиёд мешавад. Бозиҳои ролӣ (нақшбозӣ) кумак мекунанд, ки ҷавон худро дар ҷойи дигар шахс тасаввур кунад. Вай мефаҳмад, ки чаро дигарон хафа мешаванд, роҳҳои тинҷ ва осоишта ҳал кардани мушкилотро меомӯзад, сабр ва таҳаммулпазириро дар худ парвариш медиҳад.

Таҳлили психологии бозиҳо (ё рефлексия) муҳимтарин қисми раванди тарбия мебошад. Бе ин қисм, бозӣ танҳо як дилхушӣ мемонад. Маҳз дар раванди таҳлил ҷавонон дарсҳои ҳаётиро дарк мекунанд ва рафтори худро дигар менамоянд.

4. Таҳлили психологии бозиҳо ва механизми таъсири онҳо. Таҳлили психологӣ ба ҷавонон кумак мекунад, ки аз бозӣ ба ҳаёти воқеӣ роҳ созанд ва ин роҳи гузариш бошад. Ин раванд аз се марҳилаи асосии психологӣ иборат аст:

-азнавсозии эҳсосот (рефлексияи эҳсосӣ): дар ин марҳила ҷавонон эҳсосоти худро, ки ҳангоми бозӣ доштанд, ба забон меоранд. Психолог ба онҳо савол медиҳад: «Шумо дар вақти бозӣ чӣ ҳис кардед? Кӣ худро нороҳат ҳис кард ва чаро?». Ин усул ба ҷавон кумак мекунад, ки зеҳни эҳсосии худро инкишоф диҳад. Ҷавонон меомӯзанд, ки эҳсосоти худ ва дигарон (тарс, ғазаб, шодӣ)-ро бишносанд ва онҳоро идора кунанд;

-моделсозии рафтор (таҳлили амалҳо): дар ин ҷо рафтори ҳар як иштирокчӣ таҳлил мешавад. Масалан, чаро як ҷавон дар бозии гурӯҳӣ роҳбар шуд ва дигаре хомӯш монд? Зиддиятҳо ошкор мешаванд: Ҷавон мебинад, ки рафтори вай ба дигарон чӣ гуна таъсир мерасонад. Ниқоби психологӣ меафтад: Дар ҳаёти оддӣ ҷавонон кӯшиш мекунанд, ки худро дигар хел нишон диҳанд. Аммо дар равиши бозӣ хислатҳои ҳақиқии онҳо (худхоҳӣ, дарсхоҳӣ ё омодагӣ ба кӯмак) намоён мешаванд;

-интиқоли таҷриба ба ҳаёти воқеӣ (трансфер): ин марҳилаи ниҳоӣ ва мақсади асосии тарбия аст. Психолог мепурсад: «Ин вазъияти бозӣ ба кадом ҳолати ҳаёти воқеии шумо монанд аст? Аз ин бозӣ барои ояндаи худ чӣ хулоса гирифтед?». Ҷавон дарк мекунад, ки хатогиҳои дар бозӣ кардаашро дар оила, мактаб ё ҷомеа такрор накунад, вай стратегияҳои нави рафторро, ки дар бозӣ самаранок будани худро исбот карданд (масалан, гӯш кардани дигарон, гузашт кардан), қабул мекунад.

Тавассути ин се марҳила, бозии психологӣ аз як бозии оддӣ ба як дарси зиндагии бошуурона табдил меёбад. Вай дар зеҳни ҷавон тағйироти мусбати устувор эҷод мекунад.

5. Асосҳои илмии таҳлили психологӣ ва назарияи олимон. Барои дарки амиқи таъсири бозиҳо ба тарбияи ҷавонон, мо бояд ба назарияҳои бунёдии психологияи синнусолӣ такя кунем. Ду олими бузурги ин соҳа нақши бозӣ ва муоширатро дар шаклёбии шахсият исбот кардаанд.

Назарияи Лев Выготский: Бозӣ ҳамчун воситаи рушд. Психологи машҳур Лев Выготский исбот кардааст, ки бозӣ танҳо барои кӯдакон нест. Вай таъкид мекард, ки бозӣ дар ҳар синну сол барои гузаштан ба марҳилаи нави рушд кумак мекунад. Выготский мафҳуми «Минтақаи рушди наздик»-ро ба миён гузошта буд.

Иқтибоси Л. Выготский: «Дар бозӣ инсон ҳамеша як зина аз синну соли худаш, аз рафтори ҳаррӯзааш баландтар меистад. Бозӣ гӯё тамоми имкониятҳои рушдро дар ҳукми худ дорад».

Ҳангоми бозиҳои психологӣ ҷавонон вазифаҳоеро иҷро мекунанд, ки дар ҳаёти оддӣ барояшон душвор аст. Бозӣ ба онҳо қувва медиҳад, ки аз доираи имкониятҳои кунунии худ берун бароянд ва сифатҳои нави роҳбарӣ ё ҳамкориро дар худ кашф кунанд.

Назарияи Эрик Эриксон: Кризиси ҳувият ва худшиносӣ. Психолог Эрик Эриксон давраи ҷавониро марҳилаи муҳимтарини шаклёбии шахсият медонад. Вай ин давраро «Буҳрони ҳувият» (Идентификация) меномад. Ҷавон дар ин синну сол ҳамеша ба худ савол медиҳад: «Ман кистам? Нақши ман дар ҷомеа чист?». Агар ҷавон ҷавоби ин саволро наёбад, дучори парешонии руҳӣ мешавад.

Иқтибоси Э. Эриксон: «Ҷавонон на ба насиҳат, балки ба фазое ниёз доранд, ки дар он ҷо таҷриба кунанд, нақшҳои гуногунро биозмоянд ва худро бе тарси хато кардан пайдо намоянд».

Бозиҳои психологӣ, аз қабили бозиҳои нақшбозӣ (ролӣ) маҳз ҳамин фазои амнро барои таҷриба эҷод мекунанд. Ҷавон дар бозӣ метавонад нақши роҳбар, миёнарав ё ҳакамро иҷро кунад. Ин ба вай кумак мекунад, ки ҷойгоҳи ҳақиқии худро дар ҳаёти воқеӣ осонтар интихоб намояд.

Роҳҳои амалӣ намудани бозиҳо дар раванди тарбия. Барои он ки бозиҳои психологӣ натиҷаи хуб диҳанд, бояд се қадамро иҷро кард:

-интихоби дурусти бозӣ: бозӣ бояд ба синну сол ва хислати ҷавонон мувофиқ бошад;

-муҳити бехатар: ҷавон бояд тарси зери танқид монданро надошта бошад. Вай бояд озодона фикр кунад;

-таҳлили пас аз бозӣ: ин қисми муҳимтарин аст. Баъд аз бозӣ бояд саволҳо дода шаванд: Шумо чӣ ҳис кардед? Аз ин бозӣ чӣ хулоса баровардед?

Амалӣ намудани бозиҳои тарбиявӣ дар байни ҷавонон марҳилаҳои омодасозии фазои дӯстона, интихоби роҳбари фаъол, гузариши тадриҷӣ аз бозиҳои осон ба амиқ ва гузаронидани рефлексияи муфассалро талаб мекунад. Ин раванд тавассути таҳлили эҳсосот ва хулосабарории худи ҷавонон, бозиро ба воситаи самараноки тарбия табдил медиҳад.

Хулоса. Истифодаи бозиҳои психологӣ дар тарбияи ҷавонон як қадами ҷиддӣ ба пеш аст. Ин усул ба ҷавонон имкон медиҳад, ки на бо фишор, балки бо хоҳиши худ шахсияти солим шаванд. Онҳо тавассути бозӣ ҳаётро меомӯзанд, дӯст доштанро ёд мегиранд ва ба шаҳрванди муфиди Ватан табдил меёбанд. Вазорати маориф ва илм, созмонҳои ҷавонон бояд ин усулро дар мактабҳо ва донишгоҳҳо бештар истифода баранд.

Самиев Талбак Мирзоалиевич – муаллими калони кафедраи нақшакашии муҳандисӣ ва компютерии ДТТ ба номи академик М.С. Осимӣ.