Донишгоҳи техникии Тоҷикистон ба номи академик М.С.Осимӣ

ИДОМАИ НАМОИШ: САРФАҶӮӢ ВА САМАРАНОКИИ ЭНЕРГИЯ ДАР ДАВРАИ ГУЗАРИШ

Имрӯз дар Донишгоҳи техникии Тоҷикистон ба номи академик М.С.Осимӣ дар доираи намоиши сайёр таҳти унвони "Энергетика дар давраи гузариш –таъмини нерӯ барои фардо" конфронс оид ба сарфаҷӯӣ ва самаранокии энергия баргузор гардид.

Инак, тӯли 15 рӯз аст, ки дар ҷараёни намоиш муаррифии барномаҳои коммуникатсионӣ-иттилоотӣ оид ба пешбурди самаранокии энергия дар миқёси ҷаҳон ба ҳамоиш гузошта шуда, дар кори ҷамъомад намояндагони вазорату идораҳои дахлдори ҷумҳурӣ, намояндагони ВАО, ташкилотҳои ғайридавлатӣ, намояндагони корпусҳои дипломатӣ, шарикони рушд ва коршиносони дохиливу хориҷӣ ва устодону донишҷӯёни муассисаҳои таълимӣ ва таҳсилоти касбӣ иштирок ва аз он дидан намуда истодаанд, ки он аллакай ба худ хусусияти як ҷашни илмӣ – таҷрибавиро касб намудааст.

Дар конфронси имрӯза намояндагони Вазорати саноат ва технологияҳои нави Ҷумҳурии Тоҷикистон, Кумитаи меъморӣ ва сохтмони назди Ҳукумати Ҷумҳурии Тоҷикистон, Сафорати Ҷумҳурии Федералии Олмон дар Душанбе, Бонки Ҷаҳонӣ, Ташкилоти минтақавии GERES, Сафорати Фаронса, Шоҳигарии Муттаҳидаи Британияи Кабир ва муассисаҳои таҳсилоти олии касбии кишвар ва устодону донишҷӯён иштирок намуданд.

Дар рафти баргузории конфронс доир ба масъалаҳои татбиқи принсипҳои “иқтисоди сабз”, роҳандозии технологияи муосири инноватсионӣ, ба инобатгирии таъсири тағйирёбии иқлим дар раванди тарҳрезии лоиҳаҳо ва бунёди иншооти сохтмонӣ, кам кардани партовҳои газҳои гулхонаӣ, баланд бардоштани энергиясамаранокӣ, ҷорӣ намудани технологияҳои сарфакунандаи энергия ва захираҳо дар соҳаи сохтмону саноат, ҳифзи муҳити зист, принсипҳои асосии бамеъёрдарории гармимуҳофизии биноҳо, ҷорӣ намудани стандартҳои муосири гарминигоҳдорӣ, рушди истифодабарии энергияи барқароршаванда дар биноҳо, иншоот ва корхонаҳои истеҳсолӣ, омода намудани мутахассисон ва ғайра мавриди муҳокимаи маърузачиён қарор гирифт.

Бори дигар ёдовар мешавем, ки намоиши мазкур аввалин маротиба дар Осиёи Миёна баргузор мегардад ва боиси ифтихор аст, ки он дар Ҷумҳурии Тоҷикистон бо дар назардошти зарфиятҳои илмиву таҷрибавӣ дар Донишгоҳи техникии Тоҷикистон бо иштироки ходимони давлатӣ ва меҳмонони олиқадр баргузор шуда истодааст.

Ҳамоиш аз ҷониби Сафорати Ҷумҳурии Федералии Олмон дар Душанбе дар мувофиқа бо Ҳукумати Ҷумҳурии Тоҷикистон аз 28 феврали соли 2024 оғоз гардида, то 20 март оид ба татбиқи устувори ташаббусҳо вобаста ба манбаҳои энергияи барқароршаванда, сарфаҷӯӣ ва самаранокии энергия дар соҳаи сохтмон ва саноат, инчунин, гузариши энергетикии глобалӣ гузаронида мешавад.