БАРГУЗОРИИ ДАРСҲОИ КУШОДИ МАҶОЗӢ ДАР ДОНИШГОҲ
28.03.2024
БАРГУЗОРИИ ДАРСҲОИ КУШОДИ МАҶОЗӢ ДАР ДОНИШГОҲ
Санаи 15 март дар доираи амалӣ намудани созишномаҳои ҳамкорӣ бо муассисаҳои таълимии хориҷи кишвар бо мақсади амалисозии «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» (солҳои 2020-2040) машғулияти маҷозӣ баргузор гардид.
Дар доираи ҳамкориҳои дуҷониба бо Донишгоҳи илмҳои ҳаёти Руминия барои донишҷӯёни ихтисоси ҳифзи муҳандисии муҳити зист аз ҷониби дотсент, доктори ҳабилитат, Лаура Шмулеас дар мавзуи “Таъсири тағйирёбии иқлим ба соҳаи кишоварзӣ дар шароити имрӯза” ва сардори шуъбаи Эрасмус+, доктори илм, Раул Пашкалау дар мавзуи “Эрасмус+ ва байналмилаликунонӣ - омили муттаҳидии муассисаҳои таҳсилоти олӣ дар мубориза бо тағйирёбии иқлим” тариқи маҷозӣ (онлайнӣ) машғулияти назариявӣ гузаронида шуд.
Дар ҷараёни дарси кушод ба тариқи маҷозӣ омӯзгорон бо истифода аз технология ва методологияи навин ва усулҳои фаъоли таълимӣ мазмуну мундариҷаи дарсро бо истифода аз аёниятҳои муосир ба донишҷӯён ироа намуданд. Дар идомаи машғулият донишҷӯён роҷеъ ба мавзуи баррасишаванда суолу ҷавоб намуда, посухҳои мушаххас гирифтанд.
Ёдрас мешавем, ки пайваста чунин машғулиятҳои онлайнӣ бо иштироки олимону омӯзгорони донишгоҳҳои хориҷи кишвар барои ихтисосҳои гуногун доир карда мешавад, ки ҷиҳати беҳдошти сифати таълим ва баланд гардидани савияи дониши муҳассилин нақши созгор дорад.
Дар назар аст, ки минбаъд низ ҳамкориҳои мутақобила ва табодули омӯзгорони кафедраи ҳифзи муҳити зисти Донишгоҳи илмҳои ҳаёти Руминия ва Донишгоҳи техникии Тоҷикистон ба номи академик М.С.Осимӣ ҷоннок карда шуда, ҷалби васеи ҳайати омӯзгорону профессорони донишгоҳҳо ҷиҳати баргузории силсилаи лексияю семинарҳо барои донишҷӯёни ҳарду донишгоҳ ба роҳ монда мешавад.
Ҳамкориҳо
