Донишгоҳи техникии Тоҷикистон ба номи академик М.С.Осимӣ

ЗЕБОӢ ДАР ҲАРАКАТ, ДОНОӢ ДАР НЕРӮ ВА ТАВОНОӢ ДАР ПАЙГИРИСТ!

Бо ташаббуси шуъбаи кор бо ҷавонони Донишгоҳи техникии Тоҷикистон ба номи академик М.С.Осимӣ дар асоси дастуру супориҳшои роҳабрияти олии кишвар ва раёсати донишгоҳ, субҳи барвақт бо иштироки кормандон ва омӯзгорони факултети механикӣ ва технологӣ дар толори варзишии муассиса, машқи пагоҳирӯзӣ таҳти унвони “зебоӣ дар ҳаракат, доноӣ дар нерӯ ва тавоноӣ дар пайгирист” баргузор гардид.

Маврид ба зикр аст, ки дар асоси нақша – чорабинии тасдиқгардидаи раёсати донишгоҳ, ҳар субҳи рӯзи шанбе, бо иштироки садорати факултетҳо, дар толори варзишии муассиса машқҳои пагоҳирӯзӣ ва бозиҳои варзишӣ баргузор карда мешавад.

Лозим ба ёдоварист, ки зебоӣ на танҳо дар симои зоҳир, балки дар тарзи зиндагӣ, одоб ва ҳаракатҳои инсон таҷассум меёбад. Шахсе, ки субҳро бо варзиш, яъне машқи бадан ё обу тоб додани бадан оғоз менамояд, бо нерӯ ва рӯҳи тоза ба дунё менигарад. Ҷисме, ки дар ҳаракат аст, на танҳо солим, балки зебо ва дилфиреб менамояд. Аз ҳамин сабаб аст, ки мегӯянд: «Зебоӣ дар ҳаракат аст».

Варзиш, ин на танҳо воситаи солим нигоҳ доштани бадан, балки роҳи парвариши ақл ва рӯҳ аст. Тамринҳои пайваста инсонро мутамарказ, интизомнок ва босабр мегардонанд. Ин хислатҳо асоси доноӣ мебошанд. Ақли солим дар ҷисми солим парвариш меёбад. Касе, ки худро идора карда метавонад, нерӯи ботинӣ дорад ва ин нерӯ — калиди дониш ва маърифат аст.