Донишгоҳи техникии Тоҷикистон ба номи академик М.С.Осимӣ

Кафедраи забонҳои Донишгоҳи техникии Тоҷикистон ба номи академик М.С. Осимӣ дар радифи кафедраҳои тахассусӣ аз соли таъсисёбии донишгоҳ фаъолият намуда истодааст. Дар баробари такмилу инкишофи сохтори донишгоҳ кафедраи забонҳо низ чанд маротиб тағйири ном намудааст.

Сарварии кафедра ба зиммаи номзади илми филология, дотсент Темурова Момагул Қурбоналевна вогузошта шудааст. Айни замон дар кафедраи забонҳо 19 нафар омӯзгорони штатӣ ва 2 нафар ҳамкори дохила аз се фан: забони тоҷикӣ, забони русӣ ва забони англисӣ ба кори таълиму тарбия машғул мебошанд. Аз ин теъдод 7 нафар номзади илм, 6 нафар муаллими калон ва 8 нафар ассистентони кафедра мебошанд, ки 4 нафар ассистентон ба навиштани рисолаҳои илмӣ машғул мебошанд.

Мудири кафедра дотсент Темурова М.Қ. пайваста ба баланд бардоштани ихтисос ва такмили дониши омӯзгорон таваҷҷуҳи хосса зоҳир менамояд. Омӯзгорон ҳамасола аз курсҳои такмили ихтисос мегузаранд.

Бо мақсади баланд бардоштани савияи забондонӣ ва ҷалби донишҷӯён ба омӯзиши забонҳо дар назди кафедра маҳфилҳои “Дӯстдорон ва посдорони забон” (аз фанни забони тоҷикӣ), “Забон донӣ - ҷаҳон донӣ”  (аз фанни забони русӣ) ва “Мутарҷим” (аз фанни забони англисӣ) амал менамоянд, ки доираи васеи донишҷӯён ба ин маҳфилҳо шомил мебошад.

Қайд кардан ба маврид аст, ки аз заҳмати омӯзгорони кафедраи забонҳо соли 2021 дар озмуни ҷумҳуриявии “Фурӯғи субҳи доноӣ китоб аст...” донишҷӯёни донишгоҳ пирӯзӣ ба даст оварда, ду нафар ба даври шаҳрӣ ва як нафар ба даври ҷумҳуриявӣ роҳ ёфтанд. Донишҷӯёни донишгоҳ  дар олимпиадаҳои фаннӣ низ ғолиб баромада, дар олимпиадаҳои байнидонишгоҳӣ ва озмунҳои шаҳрӣ сазовори ҷойҳои намоён гаштаанд. Гузаронидани ҳафтаҳои фаннӣ бошад, барои сайқал додани сатҳи забондонӣ, таъриху фарҳанги забони омӯзонидашаванда нақши муҳим дорад.

Устодони кафедра мунтазам бо донишҷӯёни донишгоҳ ба муносибати санаҳои муҳим, бузургдошти шоирону адибони тоҷик конференсияву мизи мудаввар гузаронида мешавад, ки ин аз заҳмати софдилонаву масъулияти баланди касбиашон шаҳодат медиҳад.

Таърихи  таъсиси кафедраи”Забонҳо”

Аз рӯзи таъсисёбии кафедра онро омӯзгори пуртаҷриба Белякова Г.А.  роҳбарӣ мекард. Дар заминаи кафедраи мазкур сексияи омӯзиши  забони русӣ фаъолият менамуд. Соли 1979 кафедраи забони русӣ таъсис дода шуд, ки  мудирии онро омӯзгори калон Адилова М.А. ба ӯҳда дошт. Моҳи августи соли 1982 бо сабаби  барои таҳсил ба донишгоҳ омадани  донишҷӯёни хориҷӣ кафедраи номбурда ба ду кафедра: кафедраи  “Забони русӣ” (мудири кафедра Бабкина М.Д.) ва кафедраи “Забони русӣ барои  донишҷӯёни хориҷӣ” (мудири кафедра Ибрагимова М.С.) ҷудо шуд. Бо дарназардошти тахассусҳо ва кушода шудани факултетҳои нав ҳайати кории кафедра  низ пурра мегардид. Соли 1990 дар кафедраи забони русӣ  шумораи  омӯзгорон ба 20 нафар расид, ки дар ин вақт  ба  кафедра   омӯзгори калон Мутовкина В.У. сарварӣ менамуд.

Соли 1995  кафедраҳои забонҳои тоҷикӣ ва русӣ муттаҳид карда шуданд.  Мудири кафедра номзади илми филология, дотсент Алиев О.А. интихоб карда шуд, ки то моҳи марти соли 2009 дар ин вазифа  фаъолият намуд.

Аз моҳи марти соли 2009  то соли 2015 н.и.ф., дотсент Боқиев Ҳамза Олимович  вазифаи  мудирии кафедраро бар ӯҳда дошт. Дар ин муддат дарҷи мақолаҳои илмиву методии устодон дар рӯзномаву маҷаллаҳо вусъат гирифта, 5 нафар устодон: Муҳаммадиев Ш.М., Темурова М., Ҳикматов Ҷ.Ҳ., Қаюмова Х.А. ва Икромова С.А рисолаҳои  номзадии худро бо муваффаққият  дифоъ намуданд.

Аз моҳи марти соли 2015 вазифаи мудири кафедраи забонҳои тоҷикӣ ва русӣ ба зиммаи номзади илми филология Ҳикматов Ҷумъабой Ҳакимович вогузошта шуд. Муддати роҳбарии ӯ дар кафедра 6 нафар устодон:  Ашӯрова Т., Икромова Г.Х., Шоева Н.А., Аҳмадзода Б.С., Бобоева М.М., Камолова Г.Р. рисолаҳои номзадии худро бомуваффақият дифоъ намуданд.

Моҳи сентябри соли 2015 бо қарори Шӯрои олимони донишгоҳ кафедраи “забони тоҷикӣ ва русӣ” бо кафедраи “забонҳои хориҷӣ” муттаҳид карда шуда, номи кафедраи “Забонҳо”-ро гирифт ва дар он аз чор забон: тоҷикӣ, русӣ, англисӣ ва олмонӣ  таълиму тадрис гузаронида мешуд. Сарварии кафедра то моҳи октябри соли 2020 ба зиммаи н.и.ф. Ҳикматов Ҷ.Ҳ. вогузошта шуда буд. Соли 2017 бо сабаби кам шудани талаботи омӯзиши забони олмонӣ таълими ин фан баста шуд.

Аз моҳи ноябри соли 2020 то ҳол сарварии кафедра ба зиммаи н.и.ф., дотсент Темурова Момагул Қурбоналевна вогузошта шудааст. Соли 2020 ду нафар омӯзгори фанни забони англисӣ - ассистентон Олимова А.С. ва Султонова С.А. рисолаҳои номзадии худро бомуваффақият ҳимоя намуданд.  Айни замон бошад, 4 нафар ассистентони кафедра ба навиштани рисолаҳои илмӣ машғул мебошанд.

Ҳоло дар кафедраи забонҳо 19 нафар омӯзгорони штатӣ ва 2 нафар ҳамкори дохила аз се фан: забони тоҷикӣ, забони русӣ ва забони англисӣ ба кори таълиму тарбия машғул мебошанд. Аз ин теъдод 7 нафар номзади илм, 6 нафар муаллими калон ва 8 нафар ассистентони кафедра мебошанд.